تحریر:قاسم علی
مئی کا آغاز لیبرڈے سے ہوا جو کہ ہرسال دنیا کے بیشتر ممالک میں مزدوروں کیساتھ اظہار یکجہتی کے طور پر منایا جاتا ہے اور شکاگوکے مزدوروں کو خراج تحسین پیش کیا جاتا ہے ۔ لیکن افسوسناک بات یہ ہے کہ ضلع اوکاڑہ میں اس دن کو ئی سرکاری تقریب دیکھنے میں نہیں آئی البتہ حویلی لکھا میں حویلی سٹی الائنس کی جانب سے حسب سابق مزدوروں میں کھانا تقسیم کیا گیا جبکہ دیپالپور میں دی ارقم سکول کی انتظامیہ نے بھی مزدوروں میں کھانا تقسیم کیا اس کے علاوہ شیرگڑھ میں مختلف ورکرز تنظیموں نے مزدوروں کے حقوق کیلئے ریلیاں نکالیں.
چار مئی کو وزیراعظم عمران خان نے رینالہ میں نیا پاکستان ہاوَسنگ سکیم کا افتتاح کیا اس سکیم کے تحت کم آمدنی والے افراد کو سستے گھر فراہم کئے جائیں گے ۔اس موقع پرصوبائی وزیرہاؤسنگ سکیم محمودالرشید بھی ان کے ہمراہ تھےعمران خان کا کہنا تھا کہ کم وسائل والے افراد کو سہولیات فراہم کرنا ہماری ترجیح ہے کم وسیلہ افراد کوپچاس لاکھ گھر بنا کردیںگے
پانچ مئی کو دیپالپور اوکاڑہ روڈ پر طلبہ کا رکشہ حادثے سے دوچار ہو گیا جس میں تین بچے جان کی بازی ہارگئے جبکہ چار شدید زخمی ہوئے اس سے اگلے ہی روز املی موتی کے قریب مضرصحت مشروب پینے سے ایک ہی خاندان کے سات افراد بیہوش ہوگئے تاہم ان کو دیپالپور ہسپتال میں ہی ریکور کرلیا گیا ۔ سات مئی کو اوکاڑہ کی فضا بہت سوگوار تھی کیوں کہ اس روز بارہ سالہ خوبصورت بچے بلا ل کو اغوا کاروں نے قتل کرڈالا اس بچے کو تاوان کیلئے اغوا کیا گیا تھا جو پہلے سات لاکھ اور پھر بڑھا کر پچاس لاکھ کردیا گیا جس کے انتظام میں تاخیر ہونے پر اغواکاروں نے بلا ل کو موت کے گھاٹ اتار دیاتاہم پولیس نے ملزمان کو گرفتار کرلیا ۔
اسسٹنٹ کمشنر دیپالپور تبریز صادق مری کی جانب سے ذخیرہ اندوزوں اور جعلی کولڈ ڈرنکس بنانے والوں کے خلاف کاروائیاں بھی اس ماہ کی خاص کارکردگی رہی کیوں کہ رمضان المقدس میں یہ دونوں کام بہت زیادہ ہوتے ہیں علاوہ ازیں اسسٹنٹ کمشنر نے قبضہ گروپوں سے سرکاری اراضی بھی واگزار کرنے کا سلسلہ بھی جاری رکھا ۔ اور مختلف دیہات میں عرصہ سے قبضہ گروپوں کے چنگل سے سینکڑوں ایکڑ اراضی واگزار کروائی ۔ اس کیساتھ ساتھ اسسٹنٹ کمشنر نے ایڈمنسٹریٹر کے اختیارات ملنے کے بعد مختلف علاقوں میں صفائی ستھرائی کروانے کا سلسلہ بھی شروع کیا تاہم اس پر بہت زیادہ کام کرنے کی ضرورت ہے کیوں کہ دیپالپور میں بیشمار ایسے مقامات ہیں جہاں پر کوڑے کرکٹ کے ڈھیر لگے ہوئے ہیں اسسٹنٹ کمشنر صاحب کو اس جانب مزید توجہ دینی چاہئے ۔
دوسرا محکمہ جس کی کارکردگی کو اس ماہ مثالی کہا جاسکتا ہے وہ واپڈا کا ہے دیپالپور میں اربن سب ڈویژن کے ایس ڈی او میاں طارق بشیر نے نہ صرف سوفیصد ریکوری دی بلکہ انہوں نے اس ماہ بجلی چوروں کے خلاف آپریشن رمضان کے دوران بھی جاری رکھا اور سینکڑوں افراد کو بجلی چوری کرتے ہوئے رنگے ہاتھوں گرفتار کیا ان کے اس مسلسل آپریشن کی وجہ سے لائن لاسز اور پھر لوڈشیڈنگ زیرو ہوگئی ہے جس کا کریڈٹ میاں طارق بشیر صاحب کو بہرحال جاتا ہے کیوں کہ جن علاقوں میں لائن لاسز زیادہ ہوں اور ریکوری کی ریشو جتنی کم ہوتی ہے وہاں پر اتنی زیادہ لوڈ شیڈنگ کی جاسکتی ہے مگر دیپالپور میں ان دونوں چیزوں کو قابو میں رکھا گیا یہی نہیں بلکہ ایس ڈی او میاں طارق بشیر نے واپڈا کی جاری کردہ نئی وردی کو ضلع اوکاڑہ میں سب سے پہلے اپنی سب ڈویژن میں شروع کروایا ان کے انہی اقدامات کی وجہ سے عوامی حلقے میاں طارق بشیرکوایک ایکٹو اور محنتی افسر قراردیتے ہیں ۔
عدلیہ کی جانب سے دو فیصلوں کو بھی اس ماہ کی خاص خبر کہا جاسکتا ہے جس میں ایک فیصلہ کے مطابق تارا سنگھ میں چھ برس قبل چھ افراد کے قتل میں ملوث افراد شوکت اور محمدحسین کو چھ چھ بار سزائے موت سنادی گئی جبکہ چھ افراد بری ہوگئے ۔ یہ فیصلہ سیشن اینڈایڈیشنل ڈسٹرکٹ جج خالد ضیا فرید نے سنایا جبکہ اس کیس کے دوران پراسیکیوٹر کے فراءض ریاض احمدبلوچ نے ادا کئے تھے ۔ اس کے علاوہ ایڈیشنل سیشن جج نعمان محمدنعیم نے ماں کو دو بچوں سمیت قتلکرنے والے سفاک مجرموں کو تین تین بار سزائے موت کا حکم سنا دیا ۔
اس ماہ عوام کو خطرناک جانوروں نے بھی کافی پریشان کیا پہلے حجرہ شاہ مقیم میں پراسرار جانور کی خبر نے بھی عوام میں تھرتھلی مچائے رکھی جس سے متاثرہ ایک شخص نے وڈیو بیان میں بتایا کہ وہ بندرنما جانور ہے تاہم حجرہ پولیس اور شکاریوں کی ٹیم نے چار روز اس کو تلاش کیا مگر اس کا پتہ نہ چل سکا اس کے بعد دیپالپور کے نواحی گاؤں بھٹہ محبت میں باوَلے کتوں نے آٹھ بکروں کو چیر پھاڑ ڈالا.نیازاحمدنامی شخص نے قربانی کیلئے یہ بکرے پال رکھے تھے اس سے قبل بصیرپور ٹرین حادثے میں سات بکریوں کے ہلاک ہونے کا افسوسناک واقعہ بھی اسی ماہ پیش آیا ۔
اوکاڑہ سے عمرہ کی ادائیگی کیلئے جانیوالا خاندان مکہ سے مدینہ جاتے ہوئے وادی پروا کے قریب اسے خوفناک حادثہ پیش آگیا جس میں چار افراد جان کی بازی ہارگئے ۔ گلزارپارک کا رہائشی جاوید اپنی اہلیہ اور بیٹے سمیت جاں بحق ہوا جبکہ ایک خاتون نورین بی بی بھی زخموں کی تاب نہ لاتے ہوئے چل بسی ۔
اوکاڑہ پولیس نے گیارہ سال قبل قتل ہونیوالے دو حفاظ کرام کا قاتل ڈھونڈنکالا اور کچھ منشیات فروش بھی پکڑے مگر اس ماہ امن و امان کی صورتحال اچھی نہیں رہی اور چوری وڈکیتی کی کی وارداتیں آئے روز رپورٹ ہوتی رہیں خاص طور پر رمضان کا تیسرا ہفتہ ڈکیتوں کیلئے آئیڈیل رہا جس میں قصور روڈ پر دو تاجر لٹ گئے،پھر اوکاڑہ روڈ پر موٹرسائیکل سواروں نے نہ صرف لاکھوں روپے لوٹے بلکہ فائرنگ کرکے دوافراد کو شدید زخمی بھی کردیا اگلے روز پپلی پہاڑ روڈ پر ڈکیتی مزاحمت پر سات بچوں کے باپ کو قتل کردیا اس کے بعد رکشہ والے کو فائرنگ کرکے شدید زخمی کردیا اور اسی روز دیپالپور چوک پر خواتین سے پرس اور موبائل چھن گئے ۔ یکے بعد دیگرے ان وارداتوں کے بعد علاقے میں خوف وہراس اور عدم تحفظ کا کا احساس پیدا ہونا فطری امر ہے ڈی پی او اوکاڑہ جناب اطہراسماعیل کو عوام کے جان و مال کی حفاظت یقینی بنانے کیلئے سخت اقدامات اٹھانا ہوں گے ۔
دو مرتبہ ناروے سے انویٹیشن اور سپانسر پر بلائے جانے کے بعد ویزہ ریجیکٹ ہونے پر پاکستانی نوجوان کی جانب سے انوکھی پارٹی کا اہتمام کیا گیاجس میں رانا محمدعمران خان ایڈووکیٹ نے ناروے ایمبیسی کی جانب سے ویزہ نہ دیئے جانے پرٹیکنالوجی حب کے نوجوانوں اور اپنے دوستوں کے ہمراہ ناروے کاقومی دن منا کر ناروے میں مقیم نارویجن لوگوں کی محبت کا والہانہ جواب دیا.تاریخ میں پہلی مرتبہ ویزہ ریجکشن پارٹی منانے والے نوجوان رانا محمد عمران ایڈووکیٹ کا کہنا ہے کہ پارٹی منانے کا مقصد احتجاج ہر گز نہ ہے بلکہ اس کا مقصد پاکستانیوں کے زندہ دل ہونے کا ثبوت دینا ہے کہ پاکستانی ہر دم امن اور محبت کا پرچار چاہتے ہیں اور محبت کے جواب میں محبت کا اظہار ہماری اولین ترجیح ہے ہم زندگی کے ہر لمحہ کو بھرپور انداز میں جینا جانتے ہیں ان کا مزید کہنا تھا کہ اب دنیا ایک گلوبل ویلج ہے اور انٹرنیٹ کے ہوتے ہوئے ویزے کی شرط کے بغیر کسی بھی ملک کیساتھ پاکستان میں گھر بیٹھے کام کر کے بہترین روزگار کمایا جا سکتا ہے،ویزہ برخواست پارٹی میں میوزیکل بینڈ نے پرفارنس کی اور سب نے مل کر ناروے ڈے کا کیک بھی کاٹا۔ حاضرین نے پارٹی کے مہمان خصوصی بادشاہ اور ملکہ،ناروے کی منسٹر فارن افیئرز اور ابوظہبی یو اے ای میں ناروے ایمبسی کے ایمبیسڈر کی تصاویر کو ہاتھوں میں پکڑ کر ناروے نیشنل ڈے کا کیک کاٹااور ان کے چہروں کو اپنے چہروں پر سجا کر اس خاص دن کو بھرپور محبت اور امن کے پیغام کیساتھ منایا۔
